یاں ہوش سے بیزار ہوا بھی نہیں جاتا از فانی بدایونی

یاں ہوش سے بیزار ہوا بھی نہیں جاتا

اُس بزم میں ہشیار ہوا بھی نہیں جاتا

کہتے ہو کہ ہم وعدۂ پرسش نہیں کرتے

یہ سن کے تو بیمار ہوا بھی نہیں جاتا

آتے میں عیادت کو تو کرتے ہیں نصیحت

احباب سے غم خوار ہوا بھی نہیں جاتا

جاتے ہوئے کھاتے ہو مری جان کی قسمیں

اب جان سے بیزار ہوا بھی نہیں جاتا

غم کیا ہے اگر منزل جاناں ہے بہت دور

کیا  خاکِ رہِ یار ہوا بھی نہیں جاتا

دیکھا نہ گیا اس سے تڑپتے ہوئے دل کو

ـظالم سے جفا کار ہوا بھی نہیں جاتا

الیکشن کا زمانہ از مجید لاہوری

الیکشن کا زمانہ

اے مِلتِ بیضا! ترا خادم ہوں پرانا

افسوس کہ تُو نے مرے رُتبے کو نہ جانا

ہر کوہ کو ناپا ہے ہر اک دشت کو چھانا

انگریز نے لوہا مری چترائی۱؎ کا مانا

پھر خیر سے آیا ہے الیکشن کا زمانہ

میں خان بہادر ہوں مجھے بھول نہ جانا

عُہدوں کا ہمیشہ ہی طلب گار رہا ہوں

کرسی کا بہرحال پرستار رہا ہوں

سب جانتے ہیں حامیٔ سرکار رہا ہوں

حاکم ہو کوئی اس کا وفادار رہا ہوں

پھر خیر سے آیا ہے الیکشن کا زمانہ

میں خان بہادر ہوں مجھے بھول نہ جانا

چندہ بھی دیا جنگ میں بھرتی بھی کرائی

دادا نے میرے، مکیّ پہ گولی بھی چلائی

اور باپ نے انگریز سے جاگیر بھی پائی

ہمت نے میری جیتی تھی جرمن کی لڑائی

پھر خیر سے آیا ہے الیکشن کا زمانہ

میں خان بہادر ہوں مجھے بھول نہ جانا

’’ہوٹل میں‘‘ مجید لاہوری

’’ہوٹل میں‘‘

ہر خوشی ہوٹل میں ہے ہر لگژری ہوٹل میں ہے

کون سی شے ہے کہ جس شے کی کمی ہوٹل میں ہے

چاند، تالے، پھول نغمے، رنگ، نکہت، چاندنی

سچ تو یہ ہے اک بہارِ زندگی ہوٹل میں ہے

مے بھی ہے موجود اور حوریں بھی ہیں، غلمان بھی

تیری جنت میں جو ہے، زاہد وہی ہوٹل میں ہے

اڑ گئے تھے دیکھ کر جس چیز کو، موسیٰ کے ہوش

وہ نہیں، لیکن جھلک اس چیز کی ہوٹل میں ہے

پردۂ محمل میں لیلیٰ ہے نہ مجنوں دشت میں

حسن بھی ہوٹل میں ہے اور عشق بھی ہوٹل میں ہے

رہ گیا ہے اب ڈنر تک ساری تقریروں کا زور

قوم ہے ہوٹل سے باہر لیڈری ہوٹل میں ہے

رشک آتا ہے مجھے بھی ان کی قسمت پر مجید

خوش ہیں سب بیرے کہ ان کی نوکری ہوٹل میں ہے

تدبیر سے بگڑی ہوئی تقدیر بنا لے از ساحر لدھیانوی

تدبیر سے بگڑی ہوئی تقدیر بنا لے
اپنے پہ بھروسہ ہے تو اِک داؤ لگا لے
ڈرتا ہے زمانے کی نگاہوں سے بھلا کیوں
انصاف ترے ساتھ ہے الزام اُٹھا لے
کیا خاک وہ جینا ہے جو اپنے ہی لیے ہو
خود مٹ کے کسی اور کو مٹنے سے بچا لے
ٹوٹے ہوئے پتوار ہیں کشتی کے تو غم کیا
ہاری ہوئی بانہوں کو ہی پتوار بنا لے

کب یاد میں تیرا ساتھ نہیں، کب ہات میں تیرا ہات نہیں از فیض احمد فیض

کب یاد میں تیرا ساتھ نہیں، کب ہات میں تیرا ہات نہیں
صد شکر کہ اپنی راتوں میں اب ہجر کی کوئی رات نہیں

مشکل ہیں اگر حالات وہاں ، دل بیچ آئیں جاں دے آئیں
دل والو کوچۂ جاناں میں کیا ایسے بھی حالات نہیں

جس دھج سے کوئی مقتل میں گیا، وہ شان سلامت رہتی ہے
یہ جان تو آنی جانی ہے، اس جاں کی تو کوئی بات نہیں

میدانِ وفا دربار نہیں، یاں نام و نسب کی پوچھ کہاں
عاشق تو کسی کا نام نہیں، کچھ عشق کسی کی ذات نہیں

گر بازی عشق کی بازی ہے، جو چاہو لگا دو ڈر کیسا
گر جیت گئے تو کیا کہنا، ہارے بھی تو بازی مات نہیں

یورپ کا بین الاقوامی قانون از راجا ظفر علی خان

یورپ کا بین الاقوامی قانون

یورپ والو! تم تو سمجھتے ہی نہیں ہو انسان ہمیں
اور جو سمجھتے بھی ہو تو شاید جانتے ہو نادان ہمیں
عدل تمھارا ہے زرِ مغرب جو ہے ملمع مشرق کو
کہہ نہ سکیں گو کچھ بھی زباں سے لیکن ہوگئے کان ہمیں
طبلِ نمود بجا کر نازاں اپنے نام پر آپ ہوئے
آپ کو لمن الملک مبارک اور علیھا فان ہمیں
آپ ہیں گورے ہم نہیں کالے آپ کو شاید ہے یہ خیال
چونکہ ہے کالی اس لیے پیاری ہو ہیں سکتی جان ہمیں
آپ کو ہم سے عار ہو لیکن ایک ہیں ہم اس فرق کے ساتھ
آپ کو اپنی جان ہے پیاری اور عزیز ایمان ہمیں
ایک طرف یہ صدمۂ مطلق تم نے مراقش چھین لیا
ایک طرف یہ خوف معلق داغ نہ دے ایران ہمیں
قدسیوں نے کل نور کی یہ گت چھیڑی چنگِ بصیرت پر
وجد میں رہ رہ کر لے آئی جس کی رسیلی تان ہمیں
ہم کو ہمارے حال پہ چھوڑے، آئے ہم اس تہذیب سے باز
کچھ نہیں یورپ سے ہمیں مطلب، چاہیے پاکستان ہمیں


Bay Sar Ka Niswani Dhar