خلق کہتی ہے جسے دل ترے دیوانے کا از فانی بدایونی

خلق کہتی ہے جسے دل ترے دیوانے کا

ایک گوشہ ہے یہ دنیا اسی ویرانے کا

اک معمہ ہے سمجھنے کا نہ سمجھانے کا

زندگی کاہے کو ہے خواب ہے دیوانے کا

حسن ہے ذات مری عشق صفت ہے میری

ہوں تو میں شمع مگر بھیس ہے پروانے کا

کعبہ کو دل کی زیارت کے لیے جاتا ہوں

آستانہ ہے حرم میرے صنم خانے کا

مختصر قصۂ غم یہ ہے کہ دل رکھتا ہوں

راز ِکونین خلاصہ ہے اس افسانے کا

زندگی بھی تو پشیماں ہے یہاں لا کے مجھے

ڈھونڈتی ہے کوئی حیلہ مرے مر جانے کا

ہر نفس عمرِ گزشتہ کی ہے میّت فانی

زندگی نام ہے مرمر کے جیے جانے کا 

کزن

دنیا میں عجب ڈھنگ کا کردار کزن ہے

ہر گام پہ ہر سمت نمودار کزن ہے

حالاں کہ نہ جن نہ بھوت نہ اوتار کزن ہے

اس دور میں ہر موڑ پہ درکار کزن ہے

کہتے ہیں کہ سب رشتوں کا شاہکار کزن ہے

واللہ عجب رشتہ شاہکار کزن ہے

مانا کہ بھوت نہیں بلکہ بشر ہے

پر یہ کسے معلوم کہ مادہ ہے کہ نر ہے

حوا کی وہ دختر کہ آدم کا پسر ہے

گلفام کی بیوی ہے کہ گلنار کا بر ہے

وہ جنس جو جنس ہے پر اسرار کزن ہے

واللہ عجب رشتہ شاہکار کزن ہے

اس جنس کے پردے میں ساجن ہے کہ سجنیا

پگڑی کہیں چمکے ہے نہ چھنکے ہے کنگنیا

بس لفظ کزن بول خود گول ہے دنیا

لیکن وہ حقیقت میں کزن ہے کہ کزنیا

اس راز کے اظہار سے انکار کزن ہے

واللہ عجب رشتہ شاہکار کزن ہے

اور اس رشتے کے پہلو کے پلٹن کا یہ عالم

سالے کا کزن سالے کے سالے کا ہے باہم

ڈھونڈو جو کبھی ایک سو خود ہو فراہم

لگتا ہے کزن عرش سے گرتے ہیں دھما دھم

اس رشتے کا ہر تار لگاتار کزن ہے

واللہ عجب رشتہ شاہکار کزن ہے

لڑکی جو کوئی بوائے فرینڈ اپنا بنا لے

جل جل کے کریں طعنہ زنی دیکھنے والے

وہ شوخ پھر اک نسخۂ اکسیر نکالے

یہ کہہ کے وہ تنقید کے طوفان کو ٹالے

وہ دوست نہیں میرا خبردار کزن ہے

واللہ عجب رشتہ شاہکار کزن ہے

اور اس رشتے میں حائل نہیں بچپن نہ بڑھاپا

دو سال کا پپو ہو یا دس بچوں کے پاپا

رنڈوا ہو یا بیاہتا ہو یا کنوارہ سراپا

دوشیزہ ہو بیاہی ہو یا بیوہ بڑی آپا

شادی کا نہ عمر کا غمخوار کزن ہے

واللہ عجب رشتہ شاہکار کزن ہے

کہہ کہہ کے کزن لوگوں کو کیوں دیتے ہو چکر

کیا شرم ہے کہنے میں بھائی بہن برادر

انگریزی کے اس لفظ میں دھوکہ ہے سراسر

احمق ہی بننے کے سب انداز ہیں اظہر

اپریل کا یہ فول میرے یار کزن ہے

واللہ عجب رشتہ شاہکار کزن ہے

’’شام کو راستے پر‘‘ از میراجی

’’شام کو راستے پر‘‘

رات کے عکس تخیل سے ملاقات ہو جس کا مقصود

کبھی دروازے سے آتا ہے کبھی کھڑکی سے

اور ہر بار نئے بھیس میں در آتا ہے

اس کو اک شخص سمجھنا تو مناسب ہی نہیں

وہ تصور میں مرے عکس ہے ہر شخص کا ہر انساں کا

کبھی بھر لیتا ہے اک بھولی سی محبوبۂ نادان کا بہروپ کبھی

ایک چالاک جہاں دیدہ و بے باک ستمگر بن کر

دھوکا دینے کے لیے آتا ہے بہکاتا ہے

اور جب وقت گزر جائے تو چھپ جاتا ہے

مری آنکھوں میں مگر چھایا ہے بادل بن کر

ایک دیوار کا روزن اسی روزن سے نکل کر کرنیں

مری آنکھوں سے لپٹتی ہیں مچل اٹھتی ہیں

آرزوئیں دل غم دیدہ کے آسودہ نہاں خانے سے

اور میں سوچتا ہوں نور کے اس پردے میں

کون بے باک ہے اور بھولی سی محبوبہ کون

سوچ کو روک ہے دیوار کی وہ کیسے چلے

کیسے جا پہنچے کسی خلوت محجوب کے مخمور صنم خانے می

وہ صنم خانہ جہاں بیٹھے ہیں دو بت خاموش

اور نگاہوں سے ہر اک بات کہے جاتے ہیں

ذہن کو ان کے دھندلکے نے بنایا ہے اک ایسا عکاس

جو فقط اپنے ہی من مانے مناظر کو گرفتار کرے

میں کھڑا دیکھتا ہوں سوچتا ہوں جب دونوں

چھوڑ کر دل کے صنم خانے کو گھر جائیں گے

صحن میں تلخ حقیقت کو کھڑا پائیں گے

ایک سوچے گا مری جیب یہ دنیا یہ سماج

ایک دیکھے گا وہاں اور ہی تیاری ہے

مجھ کو الجھن ہے یہ کیوں میں تو نہیں ہوں موجود

رات کی خلوت محجوب کے مخمور صنم خانے میں

مری آنکھوں کو نظر آتا ہے روزن کا دھواں

اور دل کہتا ہے یہ دود دل سوختہ ہے

ایک گھنگھور سکوں ایک کڑی تنہائی

میرا اندوختہ ہے

مجھ کو کچھ فکر نہیں آج یہ دنیا مٹ جائے

مجھ کو کچھ فکر نہیں آج یہ بیکار سماج

اپنی پابندی سے دم گھٹ کے فسانہ بن جائے

مری آنکھوں میں تو مرکوز ہے روزن کا سماں

اپنی ہستی کو تباہی سے بچانے کے لیے

میں اسی روزن بے رنگ میں گھس جاؤں گا

لیکن ایسے تو وہی بت نہ کہیں بن جاؤں

جو نگاہوں سے ہر اک بات کہے جاتا ہے

چھوڑ کر جس کو صنم خانے کی محجوب فضا

گھر کے بیباک المناک سیہ خانے میں

آرزوؤں پہ ستم دیکھنا ہے گھلنا ہے

میں تو روزن میں نہیں جاؤں گا دنیا مٹ جائے

اور دم گھٹ کے فسانہ بن جائے

سنگ دل خون سکھاتی ہوئی بیکار سماج

میں تو اک دھیان کی کروٹ لے کر

عشق کے طائر آوارہ کا بہروپ بھروں گا پل میں

اور چلا جاؤں گا اس جنگل میں

جس میں تو چھوڑ کے اک قلب فسردہ کو اکیلے چل دی

راستہ مجھ کو نظر آئے نہ آئے پھر کیا

ان گنت پیڑوں کے میناروں کو

میں تو چھوتا ہی چلا جاؤں گا

اور پھر ختم نہ ہوگی یہ تلاش

جستجو روزن دیوار کی مرہون نہیں ہو سکتی

میں ہوں آزاد مجھے فکر نہیں ہے کوئی

ایک گھنگھور سکوں ایک کڑی تنہائی

مرا اندوختہ ہے

میرا جی 

وُہ ساحلوں پہ گانے والے کیا ُہوے از ناصر کاظمی

وُہ ساحلوں پہ گانے والے کیا ُہوے

وہ کشتیاں چلانے والے کیا ُہوے

وُہ صبح آتے آتے رہ گئی کہاں

جو قافلے تھے آنے والے کیا ُہوے

مَیں اُن کی راہ دیکھتا ُہوں رات بھر!

وُہ روشنی دِکھانے والے کیا ُہوے

یہ کون لوگ ہیں ِمرے اِدھر اُدھر

وُہ دوستی نبھانے والے کیا ُہوے

عمارتیں تو جل کے راکھ ہو گئیں

عمارتیں بنانے والے کیا ُہوے

یہ آپ ہم تو بوجھ ہیں زمین کا

زمیں کا بوجھ اُٹھانے والے کیا ُہوے

پھر ساون رُت کی پون چلی تم یاد آئے از ناصر کاظمی

پھر ساون رُت کی پون چلی تم یاد آئے

پھر پتوں کی پازیب بجی تم یاد  آئے

پھر ُکونجیں بولیں گھاس کے ہرے سمندر میں

رُت آئی پیلے پھولوں کی تم یاد آئے

پھر کاگا بولا گھر کے ُسونے آنگن میں

پھر امرت رس کی بوند پڑی تم یاد آئے

پہلے تو مَیں چیخ کے رویا اور پھر ہنسنے لگا

بادل گرجا بجلی چمکی تم یاد آئے

دِن بھر تو مَیں دُنیا کے دھندوں میں کھویا رہا

جب دِیواروں سے دُھوپ ڈھلی تم یاد آئے

گئے دِنوں کا سراغ لے کر ِکدھر سے آیا ِکدھر گیا وُہ از ناصر کاظمی

گئے دِنوں کا سراغ لے کر ِکدھر سے آیا ِکدھر گیا وُہ

عجیب مانوس اجنبی تھا مجھے تو حیران کر گیا وُہ

بس ایک موتی سی چھب دِکھا کر بس ایک میٹھی سی دُھن سنا کر

ستارۂ شام بن کے آیا برنگِ خوابِ سحر گیا وُہ

نہ اب وُہ یادوں کا چڑھتا دریا نہ فرصتوں کی اُداس برکھا

یونہی ذرا سی کسک ہے دِل میں جو زخم گہرا تھا بھر گیا وُہ

کچھ اب سنبھلنے لگی ہے جاں بھی بدل چلا دَورِ آسماں بھی

جو رات بھاری تھی ٹل گئی ہے جو دِن کڑا تھا گزر گیا وُہ

بس ایک منزل ہے بوالہوس کی ہزار رستے ہیں اہلِ دِل کے

یہی تو ہے فرق مجھ میں اس میں ُگزر گیا میں ٹھہر گیا وُہ

وُہ میکدے کو جگانے والا وُہ رات کی نیند اُڑانے والا

یہ آج کیا اس کے جی میں آئی کہ شام ہوتے ہی گھر گیا وُہ

وُہ ہجر کی رات کا ستارہ وُہ ہم نفس ہم سخن ہمارا

سدا رہے اس کا نام پیارا ُسنا ہے کل رات مر گیا وُہ

وُہ رات کا بے نوا ُمسافر وُہ تیرا شاعر وہ تیرا ناصرؔ

ِتری گلی تک تو ہم نے دیکھا تھا پھر نہ جانے کدھر گیا وُہ

غم ہے یا خوشی ہے ُتو از ناصر کاظمی

غم ہے یا خوشی ہے ُتو

میری زندگی ہے ُتو

آفتوں کے دَور میں

چین کی گھڑی ہے ُتو

میری رات کا چراغ

میری نیند بھی ہے ُتو

مَیں خزاں کی شام ہوں

رُت بہار کی ہے ُتو

دوستوں کے درمیاں

وجہِ دوستی ہے ُتو

میری ساری عمر میں

ایک ہی کمی ہے ُتو

مَیں تو وہ نہیں رہا

ہاں مگر وہی ہے ُتو

ناصرؔ اس دیار میں

کتنا اجنبی ہے ُتو